Iti kaadalman ti rabii
agmaymaysaak
a mangun-unor ti dana
a diak
ammo ti turongenna
iti
ikut nakusnawen a laglagip
Apulpulikaaw
daytoy pusok iti law-ang
iti sab-ok ti kasipngetan
ta mariknak itan
ti
kinakurapayko.
Kaanonto nga aglawag ti biagko
iti gemgem ti narungsot
ken napaidam
a gimong.
Ket iti isasangbay
dagiti mapait a laglagip
kawawen ti panunotko
ta kayatkon ti agibales
ngamin
dayta itan ti mariknak.
Gayyem, awisenka
ta kaduaennak
ket itandudota
ti kappia,
ti wayawaya.
Ti sistema a mangirurumen
masapul a mapukawen
tapno ti balligi
agwagayway
iti law-ang.
15 Agosto 1995